nulis karangan pedaran Judulnya runtah bisa nimbulkeun panyakit malaria

Hampura lamun salah:



Di daerah tropis, malaria teh kaasup panyakit anu nyebarna gancang pisan sarta tumerapna sakaligus. Ku lantaran kitu ieu panyakit teh jadi ancaman anu teu bisa diapilainkeun. 

Ceuk hasil panalungtikan Departemen Kesehatan, anu maraot ku panyakit malaria teh di daerah tropis mah leuwih ti sajuta jalma dina saban taunna. Jawa Barat kaasup daerah anu mindeng kakeunaan ku wabah malaria. 

Ari anu nyababkeunana diantarana nyaeta ruksakna lingkungan alam, upamana bae leuweung anu digunasika jeung ranca di wewengkon basisir atawa tambak anu teu kauurus. 

Ngaruksak leuweung teh apan ngaruksak ekosistem nu aya di jerona. Reungit anu tadina hirup di leuweung teh tuluy mencar ka mana-mana, lantaran tempat hirupna digadabah ku manusa. Ari ranca atawa tambak anu teu kaurus bakal jadi lahan subur tumuwuhna reungit. 

Tadina mah panyakit malaria teh dilantarankeun ku reungit tina species anopheles sundaicus anu hirupna di sawah atawa di ranca. Ayeuna muncul reungit gunung (anopheles balabacensis) jeung reungit leuweung (anopheles maculatus) anu leuwih ngabahayakeun. 

Ieu reungit anu dua teh lain bae leuwih gangas nyocona, tapi deuih daya tahanna leuwih kuat tina insektisida (obat serangga) anu ilahar digunakeun. Pikeun nyegahna kudu aya insektisida anyar anu leuwih ampuh. 

Jadi tetela ruksakna lingkungan teh loba pisan mamalana pikeun kahirupan manusa. Leuweung anu diruksak lain bae matak ngabalukarkeun ayana banjir atawa longsor, tapi oge ngondang panyakit malaria, urang kudu ngariksa lingkungan alam. 

Atuh tempat-tempat anu ilahar dipake ngendong reungit, upamna bae bak, sumur, atawa balong anu teu kaurus, kudu disa'atan caina. Kitu deui wawadahan anu jadi tempat panampungan cai hujan, ieu oge ulah diantep ngarah henteu jadi tempat mekarna jentik-jentik reungit. 

Sagedengeun eta urang oge bisa ngagunakeun insektisida, upamana bae DDT, disemprotkeun ka tempat-tempat anu sok dipake nyayang reungit.